Octoobar 14, 2017. Waxa sannad ka soo wareegay qaraxii weynaa ee ka dhacay isgoyska Soobe ee kooxda argagixisada ah ee Alshabaab ay fuliyeen. Sidii la wada ogaa waxa ku dhintay dad ku dhow afar boqol oo ruux (400), boqollaal kalena way ku dhaacawmeen.
Marnaba waxa aan la hilmaami doonin, maskaxda ummada soomaaliyeedna aan ka bixi doonin masiibadii iyo qasaarihii meesha ka dhacday, iyo argagixii bulshada soomaliyeed oo dhan ku habsaday. Qaraxyadu kala xanuun-badane, argagixisada Alshabaab waxa ku maqan dhakhaatiirtii da’yarta ahayd ee dalka u soo kacaysay ee ay maalintii qalinjabintooda ku gumaadeen huteelka Shaamow, sannadkii 2009, bishii diisambar labadeedii.
Alshabaab waxa dad soomaaliyeed gacantooda ku baxay lama soo koobi karo. Inta ay dhaawac iyo dhibaato ummada u gaysteeni waa mid aan la illoobi doonin. Alshabaab waa mid ka mid ah mashaakilka ku gudban in ay dawladnimada soomaaliya hanaqaaddo. Waa kansar halis ah oo haddii aan la iska dabargoyn soomaalidu aanay horumar ka samayn doonin.
Waxan halkan mar kale uga ducaynayaa boqollaalkii wax-ma-galabsada ahaa ee maalintaas goobta ku naf waayay. Eheladoodiina waxan leeyahay Samir iyo iimaan alle ha idinka siiyo. Aamiin
Kaynuun:-Hal-abuur 